تعرف شنية اكثر حاجة تقهر في تونس؟انو العباد الي بينات 15 و 25 سنة الي هومة بش ياخذو مسؤولية البلاد, ارائهم محقورة, حد ما يسمعهم والا يصلحهم , خاطرهم مفرخ و بهايم و جهال و ميعرفو شي و ميستحقوش بش الواحد يكسر راسو برشة مع البهامة متاعهم خاصة بعد نهار في الشارع والا الخدمة و الا نهار تعب ... حتى المعلمين و البروفات و النطاق التربوي و النطاق التعليمي قاعدين يخدمو على صبان المعلومات في المخاخ منغير ما يدخلو في العقليات و منغير ما يهمهم في العبد بيدو

يندرا قداه من واحد عايش في  جهنم عايش مشاكل خاطر امو و بوه بهايم

عايش حاجات ضد كل شيء يامن بيه و مطرد من  الدار  , مشاكل متع عبد عمرو مئة و قفة تلقاهم عند فرخ 15 سنة

عباد متازمة و كارهة روحها

عباد تحب تختفي من الوجود

عباد تحب تعيش و حد ما يسمعها

بربي علاش في التلافز ما يجيبو كان المفرخ لي هاذا يحب يولي مغني و لاخر طبيب و لوخرة رقاصة

سامحوني روضة؟ انا شهمني فيهم مافما حد في تونس يهمو فاهم تعرفشي علاه؟ خاتها ماعاش برنامج لتنمية الاجيال الصاعدة و الاهتمام بالموهبة النامية

ولاة روضة

الموهبة النامية تتلها بيها الروضة

يتلها بيها بو و ام الصغير

الفرخ ماهوش قاري شي ملي تسعين الف واحد قرا في الموسيقى و الفن و لقا روحو في التلفزة

التلفزة عايشة في عالم الوهم

و معيشة كبار المجتمع فيه

علاه ما تمشيش للعباد الي بلحق واحلة  ضايعه

علاه متركزش على الحاجات الي تهم

علاه فما برنامج متع مشاكل العباد

ناقصنا بهامتنا و مشاكلنا

برامج كيف هكا ترد العالم يتمنيك علينا

مزال فما عقليات كيما هكا؟

 

و ماهاش التلفزة كهو لي فيها العيب

معضم المقالات و البرامج و صفحات الواب التونسية متحكي كان على 5 حاجات

السياسة

التقدم الغربي و بهامة العرب

العيوب السبعة في العباد

الدين

الكورة

مع احتراماتي للعباد الي تعمل مجهود و تقرا

انتي كعبد اش تفهم من ام الساسة

من ام الدين

قاريه انتي؟

تي حتى سورةالفاتحة متعرفهاش

حلو اقراو

و علاه تذم في بلادك؟ و عبادها

هز مؤخرتك و قوم صلح حاجة

اعمل حاجة في حياتك تخليك تكون فخور بروحك كعبد

تخليك تموت وانتي عارف الي بدلت حاجة

حتى كي مطيش الوسخ في القاعة يتسمى باهي

في اليابان مفماش بوبالات في الشارع

و حد ما يطيش في القاعة

راهي المشكلة في العقلية مش في البوبالة

 

مشيت سالت توانسة كيفي كيفهم

عباد شغوفة

عباد مدبرمة

عباد من المدينة و عباد من البلدان الداخلية

عباد عندها لوجيك

علمي او ادبي

 حبيت نعرف شنيا الهدف متع حياتهم

خاتر فما بااارشا عباد عايشين هكاكا وعايشين خاتر الانتحار حرام و عايشين خاتر سوم القبر غالي و عايشين خاتر والديهم 

اما روحهم و مخهم فيهم صدى واكهو

هاذي نبذة على اهداف عباد مزيانة

 

نحب نعمل حاجة تعاون برشا عباد , تلهمهم و تحفزهم♦

كي نبدا في فرش الموت ,نحب نتذكر حياتي و نتبسم عارفة الي عملت حاجة للانسانية حتو وكان جات توصيل ستيلوات للصغار في البلدان الداخلية الي لازمهم يمشيو الف  كيلوماتر للمكتب و ميلقاوش فلوس حتى للستيلو الازرق

والا حتى معاونة طفلة بش تحقق طموحاتها 

 

 نولي احسن مصور في العالم♦

نحب ناخو صور لحاجات تخلي العباد تغزرلهم بمنظوري انا♦

نوريهم حاجات كان انا نشوفهم بعينيا

نحللهم مخهم لطرق جدد بش يغزرو للجمال

 

نحل ماركة♦

 

راحة البال♦

 

-نرد العباد تخدم مخها في عوض ما  تعيش على عادات و تقاليد و على ردات فعل يعملوها خاتر شافوها في عباد اخرى

( وزادا نحب نمشي نعيش في ايرلندا  )

 -مفهمتش علاش اما اوك-

 

نسافر العالم♦

نعيش فرحان♦

نرتح امي من الخدمة و نخدم حاجة نحبها♦

ensemble vide♦  

 .gaming المدى القصير: تجنب الفشل, مهما كان في القراية و في ال♦ 

المدى الطويل :◊اذا كان خرجت من البلاد نحب نعيش البرا من البلاد وننجح في العيشة هاذي,مش نعيش اكهو

نحب نحسن من كل بلاصة نمشيلها,مهما كان العباد والا نعمل حاجة تحسن الوضعية الي هي فيها◊                 

 

 نخدم خدمة تخليني مستور و نسافر أنا و اعز صاحب عندي والا مرتي و نهز كرتابة و ندور العالم على ساقيا♦

 ندرس الحضارات القديمة لبرشة بلدان♦

نعمل الحاجات الي حياتي كاملة نحب نعملهم ,اي حاجة تخطرلي,نحب نعيش بمجهودي ♦

نخلي أثر في التاريخ♦

نزيد حاجة للبلاد♦

 نكون ناجحة بقرايتي ونستعملها بش ندافع على حقوق العباد♦

نخدم خدمة تخليني نسافر♦

نحب نعرف برشا عباد و ننفتح على افكارهم و نعرف شنيا يخليهم مقتنعين باللي يامنو بيه مهما كان السبب تافه .نحب♦ نعرفهم كيفاش يخممو  

 

 

الحياة مزيانة

العباد محلاهم

كل واحد و زينو و افكارو  و قلبو و مخو 

كل روح في الدنيا هاذي متميزة

كل مخ يستحق يتسمع

بالافكار لي فيه