مشاكل

فما برشا مشاكل الناس مخبيتها.عقلية العباد دافنتها متحبش تصدقها و متحبش تعلن عليها،خاتر عقليات قبل مزالت ،خاتر العباد تامن بالجن الي يتحكم فيك و الي شهوة المرا الحبلى تاثر في الصغير،عباد مزالت متحبش تحكي على مواضيع خاتر الشي هاذا مشمتاعنا.عباد متحبش تخمم خاتر عندها فطور بش تطيبو تو و ماعون و قضيا و مسلسل وافلام و تعب و خدمة و قرايا،خاتر مفماش وقت للتخمام؟خاتر معندك علاه تكسر راسك في

حاجة في السيونس و الفيزيك و تفضل انك تقول سبحان الله؟ربي دعاكم بش تقراو و تتعلمو في كل الديانات.حتى في السايتانيزم يا معلم.

فما مواضيع عمرها ما تجبدت في التلافز

ساماحني علاه ديما يوريو مكاتب فيها ولاد عاقلين و قاعا نضيفة و تاران تع سبور يبرق؟

والبروفات اللي يحبو التلامذة ؟والتلميذ الي يقول مادام و يهز صبعو؟علاه مايوريوش الهمجية في الكلاسات و البروفات لي تدخل تتكيف للكلاس،كان مش حاجا اخرى ،علاه مايقولوش الي فما برفات تصلح دوفوارات التلامذة في بار.مش قالو راو الاعلام تبدل على عهد بن علي و هاك المنطق؟

.بون مع احتراماتي للبروفات الي يستحقو،عرفت بروفات كانو قرابلي اكثر

من عايلتي و يعطيهم الصحة و ربي يخليهم.

اما ساماحني الحالات الي في المدارس و الليساست و الفاكات نورمال؟

بروفات بيدوفيل في المكاتب.

تاران تاع سبور محجر و كلو حصحاص الي يجري يزلق يجي مادد الاربعة.

بنات داخلة لليسا ماغير طبلية شطر عريا،الجيب ميني و الشي الكل لبارا.

ساماحني قانون الليسا لي كل عام توزعو فيه و طحوطو فيه عل الحيوط علاه؟زينة؟

الولاد و البنات الي شادة سواقر و تدور في الكور.

البروفات الي ماياعطيوك نوت الاما تدفعلهم فلوس الايتيد الي يعسو في الباك يعاونو عل الفوسكة

و الساكسيزم في الفاكات

كانك طفلةو مصلي عل النبي راك تتنوتا. سينون تدوبل

ساماحني وينو القانون وقتلي البنات ترقد مع البروفات بش تنجح

وينو العدل لي يحكيو عليه كي البروف مايقريش و يجيبلك الدوفوار عل الحكاية لي ماقراهاش.

ويني المراقبة المستمرة كيف يجي البروف يبزنس عليك

  وينو حق التلميذ كي يعدي علا اساس 15 وتجيه 5 خاترو مش مزيان

وقتلي يكون الكوندوم ياخذوه بلاش من عند مسؤول الصحة و سيري فيزيك بالدم تاخوها تولي مشكلا

وقتلي شطر الفاك عباد تبوس في بعضها نورمال و داخلا متكيفة اما كي واحد ينقل كلمة من عند صاحبو يدخل للحبس.

وقتلي البروف يشوفلك اسمك جيست بش ماينوتيكش

وقتلي البروف اللي يعس عليك يكحل على تلميذة واقفة بحذاك في الدوفوار تنقل في الايكزيرسيس من عندك

وقتلي يدخل البروف اول حصة يقلكم انتوما مصيركم يا بطالة يا تنتحرو

وقتلي العباد الي ماتستحقش تنجح هي اللي تنجح.

وقتلي هذا الكل موضوع مايحبوش يحكيو عليه خاتر حرام...